ဝက်လက်က ဗုံးကြဲခံရမှုမှာ သေဆုံးသူ ၄ ဦးအထိ ရှိလာ၊ မကွေးနဲ့ စစ်ကိုင်းတိုင်းကို စစ်ကောင်စီက လေကြောင်းတိုက်ခိုက်မှုတွေ ဆက်တိုက်လုပ်ဆောင်နေ
မိုင်းရူပ၊ ဇန်နဝါရီ ၆ ရက်၊ ဝက်လက်
ဒီနေ့ ဇန်နဝါရီ ၆ ရက် မနက် ၁၀ နာရီဝန်းကျင်မှာ စစ်ကိုင်းတိုင်း ဝက်လက်မြို့နယ် ရေသောက်ကန်ရွာနဲ့ ပေါက်ကန်ရွာကို စစ်ကောင်စီက ဂျက်လေယာဉ်နဲ့ ဗုံးကြဲတိုက်ခိုက်ခဲ့ရာ သေဆုံးသူ ၄ ဦးအထိ ရှိလာတယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ဒဏ်ရာရသူတွေထဲက ဆေးရုံသို့ ပို့ဆောင်စဉ် ရေသောက်ကန်ရွာခံ အသက် ၄၇ နှစ်အရွယ် ဒေါ်သင်ကြိုင်ဆိုသူ ထပ်မံသေဆုံးခဲ့တာကြောင့် သေဆုံးသူ ၄ ဦးအထိ ရှိလာတာဖြစ်ပါတယ်။
“သေတဲ့သူ ၄ ဦးရှိပြီဗျ။ ဆေးရုံမှာ တစ်ယောက် ထပ်ဆုံးတယ်။ ပွဲချင်းပြီး ၃ ယောက်၊ ဘုန်းကြီးကျောင်းဆောင်နဲ့ နေအိမ်တချို့လည်း ပျက်စီးတယ်” လို့ မြေပြင်အခြေအနေ သိရှိသူ တစ်ဦးက ရွှေဖီမြေကို ပြောပါတယ်။
ဒီနေ့ မနက်ပိုင်းမှာ ပေါက်ကန်ရွာနဲ့ ရေသောက်ကန်ရွာကို စစ်ကောင်စီတပ်က ဂျက်လေယာဉ် ၂ စီးနဲ့ တပြိုင်နက် ဗုံးကြဲတိုက်ခိုက်ခဲ့တာဖြစ်ပြီး ပေါက်ကန်ရွာမှာ လူထိခိုက်မှု မရှိဘဲ ရေသောက်ကန်ရွာမှာတော့ ၅ လသား ရှင်းခန့်ကျော် အပါအဝင် အမျိုးသမီး ၃ ဦး သေဆုံးခဲ့ပါတယ်။
စစ်ကောင်စီတပ်ဟာ တော်လှန်ရေးတပ်တွေ ထိန်းချုပ်ထားတဲ့ စစ်ကိုင်းတိုင်းနဲ့ မကွေးတိုင်းအတွင်းက နယ်မြေတွေကို မြေပြင်ထိုးစစ်တွေ ဆက်တိုက်လုပ်ဆောင်နေသလို လေကြောင်းတိုက်ခိုက်မှုတွေကိုလည်း ဆက်တိုက်လုပ်ဆောင်နေတယ်လို့ သိရပါတယ်။
မနေ့ ဇန်နဝါရီ ၅ ရက် ည ၈ နာရီခွဲဝန်းကျင်မှာလည်း ခင်ဦးမြို့နယ် ကုန်းကြီးရွာရှိ စစ်ရှောင်သူများသာ နေထိုင်တဲ့ စစ်ရှောင်စခန်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့ရာ သေဆုံးသူ ၃ ဦးနဲ့ ဒဏ်ရာရသူ ၁၀ ဦးထက်မနည်း ရှိခဲ့ပါတယ်။
မြန်မာ့စစ်ဘက်ရေးရာနဲ့ လုံခြုံရေးဆိုင်ရာ လေ့လာရေးအဖွဲ့ (MDSI) ရဲ့ စာရင်းအရ ဒီဇင်ဘာလအတွင်း နိုင်ငံတဝန်းမှာ စစ်ကောင်စီတပ်က လေကြောင်းတိုက်ခိုက်မှု ၁၁၉ ကြိမ် ပြုလုပ်ခဲ့ပြီး အရပ်သား ၁၇၆ ဦး သေဆုံးကာ ဒဏ်ရာရသူ ၃၂၅ ဦး ရှိခဲ့ပါတယ်။
လေကြောင်းတိုက်ခိုက်မှုတွေထဲမှာ စစ်ကိုင်းတိုင်းက အများဆုံး တိုက်ခိုက်ခံရပြီး မကွေးတိုင်းက ဒုတိယအများဆုံး ဖြစ်ကြောင်း MDSI ရဲ့ မနေ့ ဇန်နဝါရီ ၅ ရက် ထုတ်ပြန်ချက်အတွင်း ဖော်ပြထားပါတယ်။
